Fabrikazio-prozesuen munduko eredua aldatzen ari da. Automobilgintzaren ikuspegitik, pieza aurreratuen fabrikatzaile askok zailtasunak dituzte lehiakorrak izateko, eta fabrikazioa lan-kostu merkeagoa duten herrialdeetara bideratzen ari da. Lehiakortasun-galera horretan, estanpazio-prozesuetan erabiltzen diren makinen kostu altuek, batez ere estanpazio-prentsen eta trokelen kostuek, aldaketa horren dimentsioa handitu baino ez dute egiten. Beharrezkoa da, beraz, inbertsio horien ROI metrika eta merkatuan duten kokapena hobetzea ahalbidetuko duten irtenbide berriak garatzea.
Ikerketa-proiektua Ford Kuga automobil-modeloaren alboko ateen enbutizio-prozesua aztertzera mugatu da. Lehenengo urratsa prozesua ezagutzea izan da, bertan eragina duten parametroak identifikatuz eta makinetako langileen esperientzia eta lan egiteko modua ezagutuz. Abiapuntu horretatik abiatuta, bi ildo landu dira. Alde batetik, pieza hori fabrikatzeko erabiltzen diren materialak ezaugarritu dira. Halaber, enbutizio prozesuaren simulazioak, AutoForm Engineering softwarea erabiliz, prozesua alderdi teorikotik hobeto ulertzea ahalbidetu du. Bestalde, enbutizio-prozesuaren parametroak monitorizatu dira, makinan benetan zer gertatzen den jakinda.
Parametro monitorizatuak hauek dira: materialaren propietateak, materialaren olio-maila, prentsaren eta kuxinaren parametroak (abiadura, indarra, orgaren erregulazioa), trokelaren parametroak (tenperatura, materialaren irenstea, topeen altuera) eta piezaren kalitatea. Simulazioetan eta monitorizazioan datuen azterketa sakona egin da datuetatik abiatuta, prozesuaren parametroek piezaren kalitatean duten eragina balioetsiz eta prozesua optimizatuko duen eredu adimenduna garatuz. Modelo horrek piezaren kalitate-maila kontrolatzen du, eta desbideratze bat identifikatzean makina doitzea proposatzen du.
Azterketa honetan, piezaren kalitatea baloratu da, materiala zuzenean zenbat irensten den kontuan hartuta. Kalitatearen zuzenketan eragiten duten parametro nagusiak, berriz, kuxinaren indarra eta trokelaren topeen altuera dira. Irtenbide digitalaren garapenaz gain, industrializazioa ere gauzatu da. Ikerketa egin den prentsa-lerroan integratu, erabili eta baliozkotu da soluzioa. Emaitzak oso esanguratsuak izan dira. Modeloaren bidez, makinako langileek piezaren narriadura-maila baloratu ahal izan dute, eta desbideratze bat ematean, modeloak makina doitzeko proposamenak eman dizkie, pieza txarrik gerta ez dadin. Lan-metodologia berri horren bidez, Ford Motor Company enpresak pieza txarren kopurua murriztu du, eta, aldi berean, OEE adierazlea hobetu du.
